Na sletschdi mal ufstoh und dusche hets für de Raphi gheisse, denn hüt goht de Flug hei. L Und zum letschde mol het er müsse sin Rucksack packe. Het na einisch alles uspackt und wieder inne bige! ;) Mit all üsem Gepäck sind mer denn zum Auto glofe und hends verstaut. Bevor mer üs uf de Wäg zum Flughafe gmacht hend, sind mer na was go esse und en Kaffi trinke. Am frühene Mittag sind mer mit em Auto zum Flughafe gfahre. Bitzeli zfrühe sind mer gsie zum in-ckecke. So hend mer na was trunke und en feine Dounat gesse. Aschlüssend het de Raphi chäne i-checke und ich han min Flug abgseit. Isch na e flotti Dame gsie bim ckeck-in. Denn am Raphi sin Rucksack isch het am Afang ca. 1,5kg Übergwicht gah. Hend denn paar Sache usegnoh und is Handgepäck verstaut. So het de Rucksack ke Übergwicht meh gha und mer hend nüt müsse zahle. Sind denn nachli mit em Raphi umeglofe und denn hend sich üsi Wäg trennt. Mir sind mit em Auto wiiter gfahre und er isch dur dPasskontrolle.

Hüt isch sWetter bitz besser gsie, dSunne het druckt und es het nid gregnet. Als erst sind mer denn uf en Tower gange. Es isch de höchsti Turm vode Stadt gsie und mer het en super Usblick gha über ganz Seattle. Recht schön und idrücklich gsie. J Womer denn alli Egge beschtunt gha hend sind mer wieder abe und zude UndergroundTour. Da isch es Tour gsie, wo in Untergrund vo Seattle gange isch. Seattle isch ebe mal  ca. 1-2 Stöck tüfer baue gsie. Sie hend die ganz Stadt nachemne grosse Brand ufschüttet und det drufue baue. Im Untergrund hend mer na die alte Mure und Strasse chäne aluege. Isch na spannend und idrücklich gsie. Nach dere Tour sind mer nachli dur dLäde glofe, im Mac was chlises go esse und denn zrugg is Hostel. De Raphi het denn mal afange sin Rucksack packe. Na lustig gsie, het en sicher öbe 3x packt und wieder uspackt bis denn einigermasse passt het. Im Hostel hets wieder gratis Znacht geh, so hend mer nid müsse selber koche. J Nachem Znacht sind mer na sletschdi Mal id Downton es Bier go trinke.

Hüt morge hend mer üs nachem Zmorge uf de Wäg gmacht zu Outletstors. Mit em Auto sind mer los gfahre. Isch ganz guet gange und hend denn au glie de ersti Stor gfunde. De Raphi het grosszügig ikauft und sini letschde Doller brucht! J I han au na paar Sache kauft, doch ganz im Rahme. ;) Nach dem mer dur alli Läde dure sind, hend mer üs uf de Wäg gmacht zum 2. Isch ganz ähnlich gsie. Irgendwenn hend mer aber kei Energie meh gha zum lädele und so sind mer hei gfahre. Im Hostel het de Stefan und dä Raphi Znacht koched. Ich han i dere Ziit chli nüt gmacht. Womer für de Znacht ikauft gha hend, hend mer au gad na paar Bier kauft. So händ mer nachem Znacht die gmüetlich trunke und debie na chli Spieli mit de Jasskarte gmacht.

Hüt hend mir am 11i müsse usem Zimmer sie. Sind denn mit üsem Gepäck gad is andere Hostel. Hends det chäne deponiere, jedoch sZimmer nanig bezieh. Ide Zwüscheziit sind mer denn was go esse und trinke. Zrugg bim Hostel hend mer sZimmer bezoge und üsi Sache verstaut. Aschlüssend sind mer na dur de Publik Market glofe und denn bimne Picknickplatz anegsesse. Hend na en Jass gmacht und dSunne chli gnosse. Die het jedoch nur chli dur dWulche druckt, zwüsched dure is sie es bitz use cho. J So geg die 3 sind mer mal zum U-Bahn-Zug gfahre. Isch im Untergrund gsie, doch de Zug isch au am Tagesliecht gfahre. Nachdem mir usegfunde gha händ, wie da mit em Ticket funktioniert hend mer de Zug zum Flughafe gnoh. Eigentlich hend mer en grosse Flughafe erwartet, doch er isch recht chlie gsie. Chliner als Zürich! Am Flughafe hend mer denn gwartet und gwartet und gwartet. Da de Stefan 1h bide Passkontrolle gha het, alli Sache müsse uspacke und 1000Frage beantworte, isch es chli länger gange als mer denkt händ. Aber mer hend üs denn troffe und sind zäme go sAuto hole. Da isch sehr schnell und guet gange. Mit em Auto sind mer denn in Downton zum Hostel gfahre. Nach dem Stefan sich igrichtet gha het, hend mer im Hostel Znacht gesse. Es het gratis Znacht geh, gits 3x die Wuche, ganz cool. J Aschlüssend sind mer na es Bier go neh und denn go schlofe.

Hüt hend mer eigentlich nid viel gmacht. Sind Seattle Downton bi Tag go aluege und chli dStrasse durab und wieder duruf glofe. SWetter isch nid mal so schlecht gsie, am Vormittag na bedeckt und am Mittag hets denn chli uftah. Da wär denn au scho üsi Beschäftigung gsie. ZObig hend mer üs parat gamcht für in Usgang und da isch gad na eine meh is Zimmer cho. So hend mer ihn au na gad in Usgang mit gnoh, er wo mer in Victoria troffe gha hend isch au mit cho. Sind zerst inne Bar, hend na was klises gesse und denn wiiter is Hardrock Cafe. Det hat na e Band gspielt, doch mer hend nun de letschdi Song göhrt gha. Sie hend e Pause gmacht gha womer cho sind, denn na 1 Song gspielt und denn isch fertig gsie! Voll blöd, machsch doch nid Pause und denn na 1 Song! Egal, so sind mer na i di letschd Bar. Am 2i isch da au alles fertig und so sind mer hei und hend na üses letschdi Bier im Hostel trunke.

Ja hüt morge hend mer chli Mühe gha mit ufstoh, doch mer hend müsse. Denn am 11i hend mer müsse sZimmer grumet ha. Üsi Rucksäck hend mer bis Zobig na chäne im Hostel ibschlüse. Sind denn aber nüme wiit gange. Chli ide Downton umeglofe und na i paar Läde. Im Hostel hend mer denn na was gesse und denn hend mer üs au scho uf de Wäg gamcht zude Fähre. Öpert vom Hostel, womer scho in Alaska troffe hend, isch au gad na mit üs mit cho ufd Fähre. Bevor mer denn aber ufd Fähre hend chäne, isch de Zoll na cho. Uhh isch mega lang gange bi mir und de het Froge gstellt! Doch am Schluss han ich denn en neue Stämpfel becho. J Zum Glück! Bim Raphi isch es chli schneller gange. DFähre sich fast wie imne Flugi gsie, mega eng gstuelet und sEsse au nid de Hit! Aso es isch eigentlich nid würkli e Fähre gsie, es isch en Highspeed Katamaran. Het nur Persone mitgnoh, kei Autos. Nach 2h 45min sind mer in Seattle acho, ca. zobig am 9ni. Isch na schön gsie, hend dStadt gad bi Nacht gseh. Da mer nid gnau gwüsst gah hend, wo sHostel isch, hend mer es Taxi gnoh. De ander isch au is gliche Hostel cho. SHostel isch gad ade Usgangsmeile ide Downton gsie. Drum hend mir natürlich nachem Zimmerbezieh au na es Bier müsse goh neh.

Nachdem mer usgschlafe gsie sind, hend mer üs uf de Weg gamcht id Stadt. Det sind mer na es Marinemuseum und sMiniaturmuseum aluege. Sind beidi sehr gueti und interessanti Museum gsie. Zobig ide Hostelbar hend mer na paar troffe womer kennt hend. Mit denne zäme sind mer inne Bar wo na live Musik gspielt het. Isch en ganz glatte Obig gsie. Irgendwenn hend mer denn aber gmerkt, dass mer wieder nix gesse gha hend! ;)

Hüt sind mir mit em Bus innen Blueme Park, de Butchart Garden. Es isch eigentlich na ganz en schöne Park gsie, doch het er 29Dollar pro Person kostet. Im Park hets au na es Karussel gha, da sind mer denn gad druf. J Ja womer wieder zrugg ide Stadt gsie sine, sind mer zrugg is Hostel. Irgendwie hend mer nid so Hunger gha und drum au nix zum Znacht kochet. Hend den nümme viel gmacht und sind glie go schlofe.

Nach dem mir hüt Morga üsi Sache schön büschelet gha hend, sind mir mal id Stadt gloffe. Zerst sind mer gad zum Internationale Hostel, ich han mir e Mitgliederkarte gmacht. Händ gest de Rabatt ohni Karte becho, will ich gseit han, ich mach hüt eini. Isch chli billiger als ide CH. Knapp 27Dollar het sie kostet, ide CH kostet sie 33.-! Aschlüssend sind mer gad go Ticket fürd dFähre am Fritig gho hole. So hend mer alles gmacht was mer hend welle. Denn het definitiv de Hunger grüeft und mer sind was go esse. SWetter isch hüt richtig schön gsie, hend dSunne denn bim Spaziergang ade Küste entlang gnosse. Bide Fishermanwarfs verbii, wiiter zum Krüzfahrtschiffhafe (isch zum Glück keis det gsie ;)) und denn na bimne Park verbii. Isch sehr schön gsie und gmüetlich. Bevor mer is Hostel sind hend mer na Znacht postet. Nachem Znacht han ich mini Sache gschriebe, de Raphi isch go dusche und aschlüssend sind mer na go Biliard spiele. Etz sind mer im Bett und werdet glie pfüsele.

Am Morge am 8i wär de 1. Bus gfahre, mir hend üs aber entschiede gah erst de am 12i znäh. So hend mir nämlich na chäne in Ruhe Zmorge esse und packe. Denn sind mer na go poste, eigentlich hend mer wölle Brot und Fleisch kaufe zum Iklämti zmache. Doch das vom 8i-4i kei Strom gha hend, sganzi Dorf, het au kei Fleisch im Verkauf gha. So hend mer gad mal en neui Salatsauce kauft.. Ckeck-out Ziit isch am 10ni gsie, mir händ aber därfe im Hostel blibe und det warte bis de Bus gange isch. Hend na en Jass gmacht und denn isch es au scho 12i gsie.  DBusfahrt uf Victoria isch fast 8h gange, mit ca. 1h Pause. I dere Stund sind mer in Nanaimo gise. Sind gad is erste Resti inne gsesse und hend was gesse, denn mer hend beidi langsam recht Hunger gha. Womer in Victoria acho sind hend mer nid würklich gwüsst wo dure. So han ich mal chli umegfroget und schlussendlich sind mer denn mit enere kline Anhnig losglofe. Jaja, so sind mer glofe. Mer hend denn e Hostel gfunde, nid da womer hend welle, doch isch ganz guet da. Im Hostel hend mer na 2 troffe, womer in Alaska kenne glernt gha hend. Die 2 hend sich aber nid kennt. Zuefall, hend denn na en lustige Obig gha und sind aschlüssend go schlofe.